ខេត្តកំពង់ធំ !ប្រជាពលរដ្ឋនៅខេត្តកំពង់ធំ មានសេចក្តីងឿងឆ្ងល់យ៉ាងខ្លាំងខណៈដែលនៅស្រុកកំពង់ស្វាយ និងស្រុកស្ទោង មានទីបញ្ជាការស្រាល សម្រាប់ចុះបង្ក្រាបគ្រប់បទល្មើសនេសាទ តាមបទបញ្ជាក្តៅរបស់ប្រមុខរាជរដ្ឋាភិបាល អាណត្តិចាស់។ តែរយៈពេល២ឆ្នាំកន្លងទៅនេះហាក់ដូចជាគ្មានប្រសិទ្ធភាពអ្វីបន្តិចសោះឡើយ! ខណៈដែរបង្ក្រាបខាងមុខ ដាក់ខាងក្រោយដដែលនោះ? ពោលគឺបទល្មើសនៅតែកើតមានដដែលមានដូចជា របាំងលបសាច់កាន់តែវែងរាប់សិបគីឡូម៉ែត្រលើសមុន? តិចលោ ម្ចាស់ ឧបករណ៍នេសាទល្មើសច្បាប់ទាំងនោះត្រូវរ៉ូវជាមួយសមត្ថកិច្ចដែលមានភារកិច្ចចុះបង្ក្រាបនោះទេដឹង។ បើតាមសេចក្តីរាយការណ៍បានឲ្យដឹងថា សមត្ថកិច្ចចុះបង្ក្រាបមិនលស់ថ្ងៃ ប៉ុន្តែបទល្មើសនេសាទដែលគេអាចមើលដោយភ្នែកទទេឃើញនោះមានមីដេរដាសនៅបឹងទន្លេសាបឋិតក្នុងឃុំផាត់សណ្ដាយ ស្រុកកំពង់ស្វាយ និងឃុំពាមបាង ស្រុកស្ទោងខេត្តកំពង់ធំ។ បទល្មើសនេសាទប្រើប្រាស់ឧបករណ៍កាន់តែទំនើប ជាពិសេសគឺឧបករណ៍ទាំងនោះមគេអាចមើលដោយភ្នែកទទេឃើញហើយសមត្ថកិច្ចបានចុះបង្ក្រាបជាញឹកញាប់ ប៉ុន្តែពេលដែលសមត្ថកិច្ចដកចេញ គឺបទល្មើសទាំងនោះបានអណ្ដែតឡើងវិញដដែល។ បទល្មើសនេសាទទាំងនោះសុទ្ធតែរបាំងសាច់អួន,សាច់ក្រហមនិងច្បរ មានប្រវែងរាប់ពាន់ម៉ែត្របណ្ដែតលើផ្ទៃទឹកក៏មាន, ពន្លិចក្នុងផ្ទៃទឹកក៏មាន ឯឡុកនីមួយៗវិញ ប៉ុនៗសំពៅចិន សម័យបុរាណ។ ដោយឡែកនៅក្នុងតំបន់ស្នូលស្ទឹងសែន ជាដែនព្រៃអភិរក្សវិញនោះមានបទល្មើសដាក់ដៃជាច្រើនកន្លែងនៅចំណុចជួរព្រៃបាញ់កឹបក្រោមបឹងប៉ោង ឋិតក្នុងនៅឃុំផាត់សណ្ដាយ ស្រុកកំពង់ស្វាយ។ បទល្មើសទាំងនោះ មិនមែនសមត្ថកិច្ចមន្ត្រីរដ្ឋបាលជលផលនៅតំបន់នោះមិនដឹងទេ។ ប៉ុន្តែគេបាននិយាយថា គឺបានចុះបង្ក្រាបរាល់ថ្ងៃហើយ។ បើយោងតាមការឱ្យដឹងពីប្រជានេសាទលក្ខណៈគ្រួសារខ្លះបាននិយាយឱ្យដឹងថា ការដាក់ដៃជាច្រើនកន្លែង ទាំងនោះ គឺគេរត់ខ្សែរបាំងរាប់គីឡូម៉ែត្រដោយកាច់ដាក់ឡុកផងនិងដាក់ដៃកាងផង ហើយដៃកាងនីមួយៗមាន ទទឹងពី៤ ទៅ៥ម៉ែត្រ មានបណ្ដោយប្រមាណជាង៥០ ម៉ែត្រ។ ពួកអ្នកនេសាទល្មើសច្បាប់ទាំងនោះនិយាយថាឧបករណ៍សម្ភារៈដែលយកមកនេសាទ ប្រមូលយកធន ធានត្រីនៅបឹងទន្លេសាបនេះមានតម្លៃថ្លៃណាស់ដែរ។​ ដូច្នេះបើមិនបានចូលនេសាទទេ គឺចំណាយលុយអស់ទទេតែប៉ុណ្ណោះ។ ដូច្នេះត្រូវតែហ៊ានចំណាយលុយឲ្យសមត្ថកិច្ចដើម្បីបាននេសាទ។ បទល្មើសនេសាទដាក់ដៃនេះគឺមួយម៉ោងឬពីរម៉ោង គេកាងដៃចាប់ត្រីម្ដងដែលមានត្រីស្ទើរគ្រប់ប្រភេទ ជាពិសេសត្រីធំដូចជា ត្រីរ៉ស់, ត្រីឆ្ដោរ ជាដើម បើនៅរដូវទឹកស្រកទៅវិញគឺចាប់ត្រីរាប់តោនក្នុងដៃនីមួយៗ។ ចំណែកម៉ូយទិញត្រី និងជាអ្នកជួយលុយឈ្មោះយាយ ង៉ា នៅឃុំផាត់សណ្ដាយនេះឯង។ មានន័យថា យាយង៉ា បានបោះទុនវិនិយោគ លើវិស័យបំផ្លិចបំផ្លាញមច្ឆជាតិនៅតំបន់បឹងទន្លេសាបក្នុងឃុំផាត់សណ្ដាយ នេះយ៉ាងក្រាស់ក្រែល។ ប្រភពដដែលនេះបានបន្តថា បទល្មើសនេសាទរបាំងរ៉ាវច្បរ និងដៃនេះគឺបានកើតមានតាំងពីរដូវបិទនេសាទរហូតមកដល់ឥឡូវ ឯការបង្ក្រាបភាគច្រើនគឺធ្វើឡើងតែបទល្មើសកំប៉ិកកំប៉ុក ឬបទល្មើសដែលគេត្រូវធ្វើខ្លះៗតែប៉ុណ្ណោះ។ ប្រជានេសាទនិយាយថា សព្វថ្ងៃនេះបទល្មើសនេសាទកាន់រីកតែជីវភាពអ្នកនេសាទគោរពច្បាប់ កាន់តែដាបដោយត្រីកាន់តែថយចុះ៕Moneaksekar Khmer news