ខេត្តក្រចេះ ! សកម្មភាពដឹកជញ្ជូនឈើគ្មានច្បាប់អនុញ្ញាត ឆ្លងកាត់ស្រុកស្នួល គ្មានអ្នកបង្រ្កាប ក្រុមឈ្មួញសម្រុកដឹកជញ្ជូនឈើ ឆ្លងកាត់ស្រុកស្នួល ខេត្តក្រចេះ បន្តទៅស្រុកមេមត់ខេត្តត្បូងឃ្មុំ និងខេត្តព្រៃវែង បានដោយរលូន គ្មានការបង្រ្កាបពីសមត្ថកិច្ចជំនាញ។ សកម្មភាពដឹកឈើយ៉ាងអនាធិបតេយ្យ ក្រោមខ្សែភ្នែកពីសមត្ថកិច្ចជាច្រើនស្ថាប័ន នៅតាមដងផ្លូវធ្វើឲ្យប្រជាពលរដ្ឋនឹកស្មានថា តើពួកគេអាចបើកបររថយន្តដឹកឈើទាំងនោះឆ្លងកាត់ភ្នែកសមត្ថកិច្ចចម្រុះ ដ៏ច្រើនស្អីសក្កះនៅតាមដងផ្លូវនោះម្ដេចនឹងកើត។ ប្រភ័ពព័ត៌មានបានឲ្យដឹងថា ក្រុមឈ្មួញទាំងនោះប្រើមធ្យោបាយដឹកជញ្ជូនឈើតាមរថយន្ដសាំងយ៉ុង បើកបរច្រើនគ្នាប្រសេចប្រសាចយ៉ាងអនាធិបតេយ្យពេញផ្លូវ ដោយមិនខ្លាចគ្រោះថ្នាក់ដល់អ្នកធ្វើចរាចរណ៍រួមផ្លូវជាមួយនោះឡើយ។ ក្រុមអ្នកបើកបរប្រថុយផ្សងជីវិតនិងគ្រោះថ្នាក់ដោយការបើកបរហ៊ានបុក ចំពោះអ្នកណាដែរមកពាំងនិងរថយន្តរបស់គេ។ ចំពោះសមត្ថកិច្ចខ្លះគឺពិតជាមិនអាចទៅឈរពាំងពីមុខរថយន្តដឹកឈើដ៏កាចសាហាវនោះបានទេ ប៉ុន្តែពួកគេបានសម្របសម្រួលចរចាគ្នាតាមទូរសព្ទជាមុន។ ប្រភពបញ្ជាក់ទៀតថា ក្រុមឈ្មួញដឹកឈើទាំងនោះដឹកឈើចេញពីខេត្តមណ្ឌលគីរី ចូលមកស្រុកស្នួលខេត្តក្រចេះ និងបន្តទៅខេត្តផ្សេងៗបានដោយរសេរី មិនមានការបង្រ្កាបពីសមត្ថកិច្ចជាច្រើនស្ថាប័នដែលឈរ ជើងនៅស្រុកស្នួលនោះឡើយ។ ជាពិសេសកម្លាំងកង រាជអាវុធហត្ថខេត្តក្រចេះ ឈរជើង នៅស្រុកស្នួលចាំបង្រ្កាបបទល្មើសធនធានធម្មជាតិ តែមិនបង្រ្កាបក្រុមរថយន្តដឹកឈើទាំងនោះទេ។ សកម្មភាពរបស់ពួកគេបានស្ដែងឲ្យឃើញស្ទើររៀងរបស់យប់ ហើយសមត្ថកិច្ចក៏បានអង្គុយសម្លក់រថយន្តទាំងនោះដែរ។ ជាក់ស្ដែង នៅយប់ថ្ងៃទី៧ ខែតុលា ឆ្នាំ២០២៣នេះ មានរថយន្ដសាំងយ៉ុង ដឹកឈើបន្តកន្ទុយគ្នាជាច្រើនគ្រឿងចេញពីស្រុកកែវសីមា ខេត្តមណ្ឌលគីរី ឆ្លងកាត់ស្រុកស្នួល ខេត្តក្រចេះ បានដោយសុវត្តិភាព។ សមត្ថកិច្ចដែលឈរជើងនៅតាមដងផ្លូវជាច្រើនស្រុកស្ថាប័នមាននគរបាលសេដ្ឋកិច្ច, បរិស្ថាន, មេព្រៃ… សុទ្ធតែបានទំនាក់ទំនងជាមួយពួកនៅរកស៊ីដឹកឈើទាំងអស់នោះហើយ។ ដូច្នេះវាក្លាយទៅជាទម្លាប់នៃរបបរកស៊ីដឹកឈើដោយការសម្របសម្រួលពីសមត្ថកិច្ចដែលឈរជើងនៅតាមដងផ្លូវ៕Moneaksekar Khmer news