ខេត្តស្វាយរៀង: លោក​ ម៉ែ​ន​ អេង​ អភិបាលរងខេត្តស្វាយរៀង​ តំណាងលោក ប៉េង​ពោធិ៍សា​ អភិបាលខេត្ត​ បានថ្លែងថាក្រោយការចុះអង្កេតវាយតម្លៃពីសាវតាដីទាំងអស់ខាងលើនោះ ជាលទ្ធផលដីដែលប្រជាពលរដ្ឋបានស្នើសុំនោះគឺមិនស្របច្បាប់ទេ ហើយរដ្ឋបាលខេត្តស្វាយរៀង បានផ្ញើរបាយការណ៍គោរពជូន ក្រសួងកសិកម្មរុក្ខាប្រមាញ់និងនេសាទ ដើម្បីលោកជាអ្នកធ្វើការសម្រេច។ ការថ្លែងបែបនេះធ្វើឡើងនារសៀលថ្ងៃទី១៨ខែតុលាឆ្នាំ២០២៣ ក្នុងកិច្ចប្រជុំជាមួយតំណាងប្រជាពលរដ្ឋចំនួន៣១គ្រួសារ ដែលធ្វើការស្នើសុំអន្តរាគមន៍ដោះស្រាយវិវាទដីធ្លី នៅឃុំត្រស់ ស្រុករមាសហែកនៅសាលប្រជុំសាលាខេត្ស្វាយរៀង។ លោក ម៉ែន អេង អភិបាលរងខេត្ត បានមានប្រសាសន៍សង្កត់ធ្ងន់ថា: អ្នកទាំឡាយណាដែលចូលមកកកូរកកាយក្នុងរឿងដីខាងលើនេះគឺត្រូវអនុវត្តតាមច្បាប់។ ដូច្នេះកិច្ចការទាំងអស់នេះត្រូវតែមានភាពច្បាស់លាស់ដើម្បីបិទបញ្ចប់នូវករណីទាំង៣១គ្រួសារនេះតែម្តង ដើម្បីកុំឲ្យមានការយឺតយ៉ាវបន្តទៅទៀត។ ក្នុងកិច្ចប្រជុំនោះដែរ លោក មុិញ សុីចាយ ប្រធានមន្ទីរដែនដីនគរូបនីយកម្មសំណង់និងសុរិយោដីខេត្ត បានឲ្យដឹងថា: -ទី១. យោងតាមស្ថានភាពទីតាំងដីជាក់ស្តែងដែលពួកគាត់កំពុងទាមទារជាកម្មសិទ្ធិគឺជាដីសាធារណ:របស់រដ្ឋ ស្ថិតក្រោមការគ្រប់គ្រងរបស់ក្រសួងកសិកម្មរុក្ខាប្រម៉ាញ់និងនេសាទ (មានប្លង់រឹង) គឺមិនអាចទាមទារធ្វើជាកម្មសិទ្ធិបានទេ។ -ទី២. ឯកសាររណបកាន់កាប់ដី ប័ណ្ណសំគាល់សិទ្ធិកាន់កាប់ដីប្រើប្រាស់ដីធ្លីលេខ ០៣៤០ ចុះថ្ងៃទី២៣ ខែកញ្ញា ឆ្នាំ១៩៩២ ដែលមានទំហំ៥ហិកតា ស្ថិតនៅភូមិវត្ត ឃុំត្រស់ ស្រុករមាសហែក និងឯកសារពាក្យសុំបញ្ជាក់ដីសង់លំនៅឋានមួយចំនួនទៀតគឺស្ថិតនៅភូមិសេរីអោ ឃុំត្រស់ មិនអាចយកមកជាសំអាងនិងបញ្ជាក់ស្ថានភាពនៃការកាន់កាប់ឲ្យស្របតាមច្បាប់ ដើម្បីស្នើសុំកម្មសិទ្ធិកាន់កាប់ និងចេញប័ណ្ណនោះឡើយ។ -ទី៣. ការប៉ះពាល់កម្មសិទ្ធិនៃទ្រព្យសម្បត្តិសាធារណ:ជាទង្វើខុសច្បាប់ មានចែងមាត្រា២៥៩ នៃច្បាប់ភូមិបាលឆ្នាំ២០០១ ចុះថ្ងៃទី៣១ ខែសីហា ឆ្នាំ២០០១ ដូច្នេះគណ:កម្មការគ្រប់គ្រងដីរដ្ឋ និងគណ:កម្មការសុរិយោដីថ្នាក់ខេត្ត សម្រេចច្រានចោលមិនដោះស្រាយនោះឡើយ៕nkd news